Акафист святым Первоверховным апостолам Петру и Павлу
Кондак 1
Аз есмь пастырь добрый, рекий о Себе Господь глагола к тебе, первопрестольный апостоле Петре: аще любиши Мя, паси овцы Моя; и Он же рекши: Аз есмь Иисус. Глагола от Тебе верховный апостоле Павле: яко сосуд избран Ми есть сей, пронести имя Мое пред языки. Купно же к всем обещником вашим апостолом своим рече: яко же посла Мя Отец, и Аз посылаю вы: шедше научите вся языки. Вы же толику благодать от добраго Пастыреначальника своего имуще, яко первые по Нем всея вселенныя пастырие и учителие, от всяких нас бед, на пажить спасенне сохраняйте, да зовем вам: Радуйтеся, святии первопрестольницы Петре и Павле, со всеми апостолы святыми.
Икос 1
Блажен еси Симоне, сыне Ионин, рече ти Христос, Сын Бога Живаго, достославне апостоле Петре. Мы же, како тя достойно возможем у блаженнаго Богом блажити! Но точию любовным долгом верно влекоми, сице вопием к тебе: Радуйся, первейшее по Христе между апостолы Церкве Святыя основание.
Радуйся, крепкий веры православныя столпе и утверждение.
Радуйся, теплый любителю Христова учения.
Радуйся, первоседальниче апостольскаго учения.
Радуйся, добрый Царствия Небеснаго вратарю.
Радуйся, известный кающимся о гресех врачу.
Радуйся, мирскую суету отвергший, духовную жизнь возлюбивый.
Радуйся, тленныя сети оставльший, нетленными вселенную уловивый.
Радуйтеся, с Петром и Павле, сияющие яко две светиле велице.
Радуйтеся, Богом спряженная двоице, светоумныя Его колесницы.
Радуйтеся, вси святии апостолы боговидцы, яко все вы есте свет всего мира.
Радуйтеся, яко вами от Христа везде возсия спасающая нас вера.
Радуйтеся, святые первопрестольницы Петре и Павле, со всеми апостолы святыми.
Кондак 2
Веровал еси чудно звание свышше прием, учителю языков, егда ти Иисус рече: Савле, что Мя гониши, неверием недостижимаго! Но отселе да веруеши, се бо помрачитися дерзость сопротивная: сведи, да тя избрах судеб Моих пред царьми и языки и сынми Израилевыми: таковая же внемши, Богом званный апостоле Павле, возопил еси: Аллилуиа.
Икос 2
Глас с небесе Савле слышав, зрети же по сем не могл еси; сопротивне бо гоняще непостижимаго, и ревности законной приял еси измены слепоту очима; руководим же, купели достиже Божественнаго Крещения, идеже верно погрузивыйся, прозрел еси телесныма и душевныма очима: темже о чудесном звании твоем взываем к тебе: Радуйся, Богом званный апостоле, посланный на проповедь всем языком.
Радуйся, сосуде избранный, точащий сладость веры Христовы всем человеком.
Радуйся, самовидче озарившаго тя свышше Божественнаго света.
Радуйся, паче иных просвещенный благодатию по сени Ветхаго Завета.
Радуйся, Господу Иисусу, явшу ти ся на земли собеседовавый.
Радуйся, укреплением Его жестоко неверующих обличати дерзавый.
Радуйся, всю вселенную просветивый богомудрыми твоими писании.
Радуйся, паче всех по Христе потрудивыйся о человечем спасении.
Радуйтеся, с Павлом и Петре, яко два херувимы кивот Церкве Святыя покрывающии.
Радуйтеся, яко два серафими престолу Вышняго предстоящии.
Радуйтеся, вси святии апостоли, яко вы есте небеса поведающии славу Божию.
Радуйтеся, яко вы есте звезды, венчающии Церковь, невесту Христову.
Радуйтеся, святые первопрестольницы Петре и Павле, со всеми апостолы святыми.
Кондак 3
Дивился еси в ужасе Петр святый апостол, видя плащаницу ниспущенну свышше, в ней же бе притча человеколюия Божия, всеми животными, паче же и нечистыми прознаменующая, яко от всех язык произволяющих веровати в Христа Иисуса, неподобает отметати: толику же тайну уразумев, возопил еси Богу: Аллилуиа.
Икос 3
Естество рода скверна и нечиста, николиже вниде в уста моя, рекл еси всеблаженне апостоле Петре; но Божественный промысл отвеща тебе гласом с небеси: яже Бог очистил есть, ты не скверни, сим назнаменуя, яко не прииде Спас призвати праведных, но грешных на покаяние. Мы же сия явленное тебе уведевше, вопием: Радуйся, апостоле милостивне, Царствие Небесное, отверзаяй.
Радуйся, не на лица, но на дела всех язык взираяй.
Радуйся, множество наших покрываяй твоею любовию.
Радуйся, и малое покаяние совершаяй своею милостию.
Радуйся, скорый помощниче, призывающим тя в бедах душевных.
Радуйся, молитвою твоею воздвизаяй душею и телом мертвых.
Радуйся, слышащих слово твое верных, Духом Святым укрепивый.
Радуйся, словеси твоими, яко стрелами, неверных уязвивый.
Радуйтеся, с Петром и Павле, яко два очеса Церкве Боговидная.
Радуйтеся, недремлющими веждома хранящии новаго Израиля.
Радуйтеся, вси святии апостоли, яко стражие на стенах Иерусалимских.
Радуйтеся, наставницы наши бдящии о душах христианских.
Радуйтеся, святые первопрестольницы Петре и Павле, со всеми апостолы святыми.
Кондак 4
Живущим в Дамасце людем проповедати начал еси, Богом просвещенный апостоле Павле, да веруют во Христа Иисуса, Сына Божия, ихже в удивление ввел еси: како иже верующих в имя Христово прежде гоняше, се и сам претворися в верна! Темже и убити тя совещаша. Уведав же совет их и жестосердие тех в слепоте неверия оставль, от верных кошницею по стене низпущен, возопил еси Богу: Аллилуиа.
Икос 4
Зельною ревностию проповедал еси Павле святый укланятися от служб прешедших Ветхаго Закона и обрезания, притекати же к бане Божественнаго Крещения, не токмо сущим от еврей, но и от язык, ихже и любезнейший учитель был еси; сего ради приглашаем тебе сице: Радуйся, проповедниче Богом посланный к возвещению грешным покаяния.
Радуйся, громогласный учителю благочестия, обличителю злочестия.
Радуйся, от язык к вере Христовой притекающих милостивый приветниче.
Радуйся, заблудших от пути праваго истинный наставниче.
Радуйся, кораблю соблюдающий от греховнаго погружения.
Радуйся, кормчий, управляющий ко пристанищу богоугождения.
Радуйся, скорбящим скоропредстательный утешителю.
Радуйся, немощей душевных и телесных немздоприемный исцелителю.
Радуйтеся, с Павлом и Петре, яко две крыле Церкве от Христа орла великаго.
Радуйтеся, и яко две криле ей голубине данныя от Духа Святаго.
Радуйтеся, вси святии апостоли, целы яко голуби, и яко орли упованием окрилатевшии.
Радуйтеся, идеже Христов в теле, таможде и вы собранные.
Радуйтеся, святые первопрестольницы Петре и Павле, со всеми апостолы святыми.
Кондак 5
Земными потяся труды и от лова рыбнаго питаяся, воззван был еси, апостоле святый Петре, и веровав, обильно питающему Христу, Иже от пяти хлебов толико тысящь народа насытил есть; последовал еси Ему, труждаяся о брашне негиблющем, но пребывающем в живот вечный, и вопия яко Богу: Аллилуиа.
Икос 5
Имея запрещение от архиерей и старец иудейских, не учити о имени Господа Иисуса, блаженный Петре апостоле, верою несумненною вооружься, отвещал еси, повинутися подобает Богови паче, нежели человеком; за сие же темницу и раны претерпев отшел еси радуяся от лица собора, яко за имя Господне сподобился еси безчестие прияти. Сего ради и мы радостная приносим тебе глаголюще: Радуйся, сонмище иудейское писании пророческими о Христе посрамивый.
Радуйся, лживая прения фарисеев и саддукеев яко паучину растерзавый.
Радуйся, многи чудеса благодатию Духа Святаго соделоваяй.
Радуйся, хромым хождение и слепым прозрение подаваяй.
Радуйся, и сению твоею от одров болезни возставивый.
Радуйся, страждущих от дух нечистых многих исцеливый.
Радуйся, ловцев рыб к чудно призываяй ловитве.
Радуйся, яко рыбы безгласны, неверных привлекаяй к вере.
Радуйтеся, с Петром и Павле, яко два суща невесты Христовы Церкве матере нашея.
Радуйтеся, и яко два грозда винная, питающая нас и веселящая.
Радуйтеся, вси святии апостоли, яко вы есте розги Христа лозы истинныя.
Радуйтеся, яко вы есте и добрые делателие винограда Христова.
Радуйтеся, святые первопрестольницы Петре и Павле, со всеми апостолы святыми.
Кондак 6
Израильтянин от колена Венеаминова, по закону фарисей, по ревности гонитель Церкве Божия, именовался еси апостоле, святый Павле, не покровенно извествуя прежняя своя напраснства на верующих в Христа Иисуса; но яко по премногу гонил еси Церковь Божию и разрушал ю, тако ныне славно таяжде тобою украшаема, и медоточными твоими ученьми крепко утверждаема, вопиет к Богу: Аллилуиа.
Икос 6
Кто ны разлучит от любве Божия? Скорбь или теснота или гонение и подобная сим, рекл еси боголюбезный проповедниче вселенныя, апостоле Павле. Всех в Христа верующих, усердно рекл еси к любве Его приводя, яко да доблественне и благодарне Бога ради скорби претерпеваем. Темже любезно приглашаем тебе сице: Радуйся, ревнителю, бывый в законе Савле званный.
Радуйся, в благодати совершенный любителю Христов, Павле нареченный.
Радуйся, свете богоразумия сущим во тьме неведения.
Радуйся, звездо наставляющая бедствующих в глубине беззакония.
Радуйся, души верных Христу обручивый и в чертог небесный призвавый.
Радуйся, многи скорби претерпевый и прочих терпети утвердивый.
Радуйся, его же руками Бог Силы непросты творяше.
Радуйся, его же и главотяжкии потные недужныя исцеляше.
Радуйтеся, с Павлом и Петре, яко два столпы Церковь небеснаго Соломона утверждающие.
Радуйтеся, и яко два крины на столпех его святилище Божие украшающие.
Радуйтеся, вси святии апостоли, яко цветы всему миру издающии благоухание.
Радуйтеся, благоуханием вашим отгоняющие всякаго беззакония злоухание.
Радуйтеся, святые первопрестольницы Петре и Павле, со всеми апостолы святыми.
Кондак 7
Людий, живущих в Лиде дошед, удивил еси, блаженный апостоле Петре, егда Енея от осьми лет лежаща на одре разслабленна возставил еси именем Иисуса Христа ходити. Во Иопии же умершую Тавифу на живот молитвою паки возвратил еси. В Кесарию же призван, Корнилия сотника со всеми сущими в дому его, Божественным Крещением просветил еси; и вси абие единодушно взываху: Аллилуиа.
Икос 7
Мысляше Симон волхв благодать Святаго Духа сребром стяжати, его же блаженный апостоле Петре погибели быти наследника и сребром обличи, и сребролюбный нрав святокупства, яко же и святотатства, жестоко запретил еси; темже приглашаем ти сице: Радуйся, Церковь Христову благодатию духовною обогативый.
Радуйся, мздоприятие за святая в церкве запретивый.
Радуйся, имже сребролюбие яко корень всех злых от благодати духовныя отсечеся.
Радуйся, имже лихоимание, яко идолослужение от святыни отвержеся.
Радуйся, жития нестяжательнаго Христа ради научивый.
Радуйся, заповедь Христову: не можете Богу работати и мамоне, добре исполнивый.
Радуйся, и святотатство Анании смертию казнивый люте.
Радуйся, и Сапфиру в томже согласующую, тойжде предавый казни.
Радуйтеся, с Петром и Павле, яко есте две маслине милость источающии.
Радуйтеся, яко есте два светильники премудростию светящии.
Радуйтеся, вси святии апостоли, яко леторасли масличныя.
Радуйтеся, от них же всяк есть, яко маслина в дому Божием плодовитая.
Радуйтеся, святые первопрестольницы Петре и Павле, со всеми апостолы святыми.
Кондак 8
Небесе третияго достиг, душевныя и телесныя ради твоея святыни и неизреченными богодарованми обогатився, оттуду сшел еси, богоблаженне апостоле Павле, и всех удивил еси, исполняя богоразумными учении, сущих от Иудеи же и от язык в Христа верующих. С ними же купно и мы все верные, тогожде небеснаго учения твоего причастницы, вопием Богу: Аллилуиа.
Икос 8
Образ сущи верным, многия раны жезлием и камением биения, на теле твоем радостно терпел еси, сладкаго ради Иисуса, Богом званный апостоле Павле, наказуя явственне, яко в Христа Иисуса верующим, свойственно есть Его ради всякия скорби благодарне терпети: отнюду же и мы пользующеся, вопием ти сицевая: Радуйся, язвы Господа Иисуса на теле своем радостно носивый.
Радуйся, адаманте крепкий душею и телом, всякия скорби сильно претерпевый.
Радуйся, пред языки и царьми исповедниче Христов непреборимый.
Радуйся, пред законоучительми израильскими учителю непобедимий.
Радуйся, светозарная луче, от третияго небеси просиявшая.
Радуйся, многоплодная лозо от рая пищи духовныя исполненнаго прозябшая.
Радуйся, учением твоим всю поднебесную яко немерцающим светом озаривый.
Радуйся, пользою дел твоих, яко пресладкими плоды по всей земли верных напитавый.
Радуйтеся, с Павлом и Петре, яко два древа посреде рая церковнаго.
Радуйтеся, творящии плод жизни и разумения добраго.
Радуйтеся, вси святии апостолы, яко финики и яко кедры мысленные.
Радуйтеся, яко сад небеснаго Отца на небо пресажденные.
Радуйтеся, святые первопрестольницы Петре и Павле, со всеми апостолы святыми.
Кондак 9
Промышление общее творил еси, блаженне апостоле Петре, о всех приходящих к вере Христовой, имже сердце и душа едина; темже и требованию их пристави служителя целомудреннаго Стефана с шестми диаконы. Сам же со апостолы молитве и слову учения прилежал еси, наказуя всех верных, вопиющих единоумно Богу: Аллилуиа.
Икос 9
Ревностию по Господе своем разжегся, Малхови усекл еси ухо, яко неприклонное к слышанию пророческих писаний о Христе Иисусе; и о таковой дерзости возбранен быв Учителем своим, блаженный апостоле Петре, благодарне прещения Его и вся сопротивная приключения претерпел еси. Темже поминающе ревность твою, приглашаем ти сице: Радуйся, ревностию твоею по Христе учительми прочиих превозшедый.
Радуйся, в вертограде оружниче Христов мужественный.
Радуйся, ведену Иисусу на страсть до дому Каиафы последовавый.
Радуйся, Господа своего ради и в темницу и на смерть готовый.
Радуйся, немощь свою в отвержение исцеливый горьким рыданием.
Радуйся, в первое достоинство призванный по Воскресении Господнем.
Радуйся, и прочим согрешающим в образ покаяния данный.
Радуйся, многажды прощати немощи кающихся увещанный.
Радуйтеся, с Петром и Павле, яко две заповедей Господних скрижали.
Радуйтеся, любве к Богу и к ближнему учителю.
Радуйтеся, вси святии апостоли, вся заповеди Господня совершенно сохранившии.
Радуйтеся, вся оставльшии и вслед Христа шедше вся о Нем обретшии.
Радуйтеся, святые первопрестольницы Петре и Павле, со всеми апостолы святыми.
Кондак 10
Свидетельство велие извествовал еси от пророческих речений о Христе, пред начальники иудейскими, пред судиею же Фестом и пред царем Агриппою, Богом званный апостоле Павле, идеже, ово поносне укорен: яко многия тя книги в неистовство прелагают, ово же льстивно ответован, осужден был еси на послание в Рим, еже все благодарно терпя, возопил еси с верными Богу: Аллилуиа.
Икос 10
Троицу Живоначальную проповедати в третием небеси наставленный, преизбранный сосуде великих таин Божественных, апостоле Павле: благовествуя пред языки, судиями и царьми, обещал еси всем спасение во Христа Иисуса веровати хотящим, и Крещение Святое во имя Троическое приемлющим. Сего ради и мы, все верные, тогожде спасения благонадежни суще, вопием к тебе сице: Радуйся, многоразсудный откровений Господних таинниче.
Радуйся, в трех лицех Единаго Бога исповедниче.
Радуйся, едино основание верующих, Христа быти проповедавый.
Радуйся, всех благочестивых в томже исповедании утвердивый.
Радуйся, от Феста невернаго претерпевый неистовля поношения.
Радуйся, пред ним вещавый глаголы истины и целомудрия.
Радуйся, царю Агриппе небесное видение повествовавый ясне.
Радуйся, лесть его несоизволяющую на веру Христову обличивый яве.
Радуйтеся, с Павлом и Петре, яко две трубы Моисеовы сребряныя.
Радуйтеся, созывающии на брань противу злобы поднебесныя и подземныя.
Радуйтеся, вси святии апостоли, яко добрые Христовы воини злопострадавшии.
Радуйтеся, верою победившии царствия земная и небесная восхитившии.
Радуйтеся, святые первопрестольницы Петре и Павле, со всеми апостолы святыми.
Кондак 11
Убивши Ирод Иакова Зеведеова, приложи яти и тебе, богоблаженный апостоле Петре; его же в темнице крепко стрегома на убиение. Молитве же прилежней бываемой от Церкве: ангел Господень разрешив от уз, изведе сквозе врата о себе отверзшаяся; мнящу ти сон видети, но отступльшу ангелу, быв в себе, познал еси воистинну свобожденна тебе быти от Бога и благодарно возопил еси Ему: Аллилуиа.
Икос 11
Филиппом вопрошенное: Господи, покажи нам Отца, уведел еси блаженный апостоле Петре, на горе Фаворствей, на нейже преобразуема Господа преславное изменение лица зря, слышал еси о Нем с небесе глас Бога Отца: Сей есть Сын Мой возлюбленный, о Нем же благоволих, Того послушайте. Мы же толико явления сподобльшемуся тебе вопием: Радуйся, достоверный сведителю Преображения Христова.
Радуйся, известный слышателю с небесе Божественнаго гласа Отча.
Радуйся, лице Сына Божия просветившееся, яко солнце, видевый.
Радуйся, осенение Духа Святаго во облаце светле получивый.
Радуйся, ему же на горе святой превысокая тайна открыся.
Радуйся, ему же Троицы Пресвятыя велелепная слава явися.
Радуйся, исход Христов слышавый имущь быти во Иерусалиме.
Радуйся, и свой исход скончавый по Христе на кресте в Риме.
Радуйтеся, с Петром и Павле, яко две горы Фавор и Ермон мысленныя.
Радуйтеся, от восток и запад землю обетования на небеси являющии.
Радуйтеся, вси святии апостоли, яко горы Сионския.
Радуйтеся, искапающии нам сладость спасения.
Радуйтеся, святые первопрестольницы Петре и Павле, со всеми апостолы святыми.
Кондак 12
Херувимом равностоятеля, поем тя, всеблаженне апостоле Павле, в третием небеси Божественною премудростию просвещеннаго: тамо бо слышав неизреченныя глаголы, яже не леть есть человеку глаголати, с теми вселенную обхождаше, уча веровати в распятаго Христа, Сына Божия, и Ему, яко истинному Богу непрестанно воспевати: Аллилуиа.
Икос 12
Откровением премногим Божественных таин исполнен, избранный сосуде Иисусов, премудрый апостоле Павле, известно пронесл еси имя Бога в плоти явльшагося, и верующих в Него спасающаго; к Немуже многи языки обратив и подвигом добрым подвизався, течение свое преславно за имя Господа своего в граде Римском совершил еси. Прочее же, имущему отложенный венец правды, вопием тебе сице: Радуйся, великий любителю имени Иисусова много за Него пострадавый.
Радуйся, о имени Его небесным, земным и преисподним кланятися засвидетельствовавый.
Радуйся, яко добре свидетельствовал еси о Господе в Иерусалиме.
Радуйся, сице от Тогожде повеленный свидетельствовати в Риме.
Радуйся, Нерона царя обличивый и жену его к вере Христовой обративый.
Радуйся, в томжде Риме с Петром распятым стремглав, главу свою под мечь преклонивый.
Радуйся, яко в усечении главы твоея честныя млеко истече.
Радуйся, яко сие крайнее удивление многи воя к вере привлече.
Радуйтеся, с Павлом и Петре, яко две реце воды живыя от источника Духа Святаго истекающии.
Радуйтеся, совокуплением двою рек Иор и Дан проявленные.
Радуйтеся, вси святии апостоли, яко речная устремления, веселящий град Церкве Божия.
Радуйтеся, яко потоки сладости, напаяющии всех.
Радуйтеся, святые первопрестольницы Петре и Павле, со всеми апостолы святыми.
Кондак 13
О всеславнии и всехвальнии ученицы Господни, Петре и Павле первопрестольнии, и все сопрестольнии апостоли святии! Иже всю вселенную верою святою просветисте и с Христом судити весь мир имате: вам по достоинству не на земли, но на небеси совершенная угодна есть слава и хвала; наше же недостойное нынешнее моление приемше, от всяких нас бед достойными вашими молитвами сохраняйте и праведнаго судию Христа умолите милостива нам на Страшном Суде быти: да вашим промышлением спасаеми, воспеваем Спасителю Богу: Аллилуиа, Аллилуиа, Аллилуиа.
